Soxe

Isirayila jamaanen ŋa, soxoɲiiɲon ɲi non ŋa, maranu yogonu xa ɲi non ŋa, soxe ra ma ɲi ɲaana kun noqunu yi, baawo ɲiiɲen kaawanten ɲi. Gidun nan gaba kun maranu yi. Xaaxon do kiineyen ya na non xa yi xo Fatanbinnira moxo. Xaaxon ga na ri, ɲiiɲen ga na sefi, sokken na bogu. Xaaxon ga na ɲeme, kiyen do fanken na sokkun kaawandi. Kiineyen ŋa, naaburun ɲi tanpini, baawo i ma ɲi yigefo kitana.

Ke natali ni yugo yogo ya yi a ga soxono ti sarin ŋa. Gannin ŋa, Yahudiyanun ɲi sarin dabarini ti sollu sikki ya yi, i ga i yette me yi ti kaccen ŋa. Solli baane ɲi wureedun ŋa ken baraxaten ga ɲi, a sexeten xa ɲi. I ɲi sarin roono gunbu filli ya yi nan soxo.

Axa yaaxen ga ke yugo be natalinten ŋa, a na alikaaman ya sanqini. Alikaama funsen na xo maaro funsen moxon ya. I ga na ten janŋu nan duguta, i ɲi a sanqini. I ɲi soxooden roono booto yogo ya noxon ŋa nan tere do ten su noxon ŋa na a sanqi.

Alla kitaabu sennun noxon ŋa, Isa da yugo yogo masayilan ko a ga soxooden sanqini ten ŋa. Soxoodu yogonu yere killen ŋa, yelinŋun da i soppi. Yogonu yere koccin noqun ŋa do xeexenin noqun ŋa, i ma katu xoorono. Soxoodu tananu xa yere ɲiiɲi siren ŋa, kun funti, nan xooro ma i ga ɲaana purin ŋa, xo makkan ga na moyi. (Luka 8.5-15)

Alikaaman ga na ɲa purin ŋa, ken wa a koyini ti a moyi, ken biren ŋa i na a fata. Xo o yaaxen ga a yi moxo be natalin noxon ŋa, yugon wa alikaaman fatana ti xedon ŋa. I ga na duguta fateyen ŋa, i na alikaama ke dugaani na a kaawandi. Yaxarun ɲi yugun deemana ken golle yi.

Axa yaaxen ga ke natali be yi, yugon wa gunbun geesunu, gunbu ku wa alikaaman katta. Ke yugo da Yahudiyan sariyan batu, ken ga ni: “Gunbo be ga an alikaaman katta, maxa fo ro a raqen ŋa, fo be ga a kabana alikaama ke yogo yigana.” (Laahidu fillante 25.4). Ken ŋa, gunbon ra wa fonne yigana funsen ŋa na a toxo gollen noxon ŋa. Yahudiyanu beenu, gunbu ga ma ɲi i maxa, i kun ɲi alikaaman katta ti gumanun ya yi.

I ga na ɲi alikaaman woyini, fanken ga na giri, i na yaabanun ya katta alikaama katunten wure, nan toxo a sedini kanmun ŋa. Fanken na alikaama kagen deŋe, funsen na toxo beran ŋa. I wa tini ken golle danŋa ti: “alikaamawoyiye”.

Soron ga na duguta woyinden ŋa, i ɲi alikaama funsen roono ginon noxon ŋa na i rondi konpen noxon ŋa, walla xa i na gino ku bulu ɲiiɲen wure.

Yaxarun ɲi alikaama funsun roono gidi lefeten ya kanma na i teppi ti gide morogo-morogonte yogo yi. I na yille gide ke ɲaana na i tirinxisi, i na a ɲa juran ŋa.