Kittirangolle

Mirinde

Ke yaxare faayi yiraamen ya mirini. Gannin ŋa, Yahudiyanun yaxarun ɲi yiraamen mirini ya xo ke natali ga a koyini moxo be. Hari lenki i wa finna yiraamen mirini. Yaxarun ɲi gararondini, i na fo dabari i yinme danŋa, i na fo dabari i kaadunkon xa danŋa. I ɲi fo xa gaagana, waxatinu yi. (Mateyo 9.16, Ɲangollu 16.14)

“Papirusu” do kitaaben dabarinde

Axa yaaxen ga sokke be yi kundu, a toxon ya ni “Papirusu”. A bakka xoolun ya xannun ŋa, do faranun noxon ŋa. Natali ke ya, papirusun yetta xanton wa yaxaru filli yinmen ŋa, yugun xa wa a mirini daagon ŋa ti mirindifon ŋa.

Yahudiyanun ɲi kaahitin xa dabarini ti papirusun ŋa. I ɲi deru gabo kappa me yi na i teppi doome na i lefetondi. Ken falle i na i kaawandi kiyen ŋa, i na ɲa kaahiti xoten ŋa. Gannin ŋa, Alla kitaabu yogonu safe papirusun kanma. (Luka 4.17, 2 Yoxanna 12)

Yahudiyanun ɲi safandini daaba fate moosinton xa kanma. (Yoxanna 2.6, Oromunko 9.21)

Gino do yigexollon dabarinde

Yahudiyanun ɲi i ginon do i yigexollon dabarini ti doori binnen ya yi. Axa yaaxen ga yugo be yi yere, a na ginon ya tagana na i gaaga. Ginitagaanan ya ni. Yugu filli tana wa dooren xootini ginitagaanan danŋa. Baane wa jin joqo dooren ŋa, baanen wa a danpunu. Ginitagaanan da dooren soxundi gide morogo-morogonte yogo kanma. A na i taanun jippa gide tana kanma na dooren moroga-moroga. Ken biren ŋa keeta a na doori binne ke dabari na a ɲa i liŋun ŋa ti i kittun ŋa. A ga na fo beenu dabari ti doori binnen ŋa, a na i buyi, ken wa i kendendini siri.